NAMDALSEID: NVE har gjeve løyve til regulering av to vatn og reetablering av to kraftverk i Namdalseid.
Namdalseid kommune i Nord-Trøndelag får løyve til å regulere Statlandvatnet med 2,7 meter og Storvatnet med 3 meter.
I tillegg har Norges- vassdrags- og energidirektorat (NVE) gjeve løyve til å reetablere Storfossen minikraftverk og Lillefossen mikrokraftverk i Statlandvassdraget.
Vatn til Namdal Settefisk
NVE legg vekt på at tiltaket vil kunne betre tilhøva for dagens produksjon av smolt ved eksisterande settefiskanlegg, Namdal Settefisk AS, og gje ny kraftproduksjon på ca. 4 GWh i eldre anlegg.
Storfossen kraftverk vil få ein installert effekt på 480 kW og ein årleg produksjon på omlag 3,3 GWh, noko som svarar til straumbruken til rundt 160 husstandar.
Lillefossen kraftverk vil få ein installert effekt på 86 kW og ein årleg produksjon på omlag 0,64 GWh, noko som svarar til straumbruken til rundt 30 husstandar.
Av omsyn landskap, friluftsliv og storlom i og ved Storvatnet og Statlandvatnet vert reguleringa noko avgrensa i sommarsesongen. Av omsyn til biologisk mangfald og friluftsinteresser skal det heile året sleppast ei minstevassføring i utløpselva frå Finnhallerdammen ved Storvatnet, frå Statlandvatnet forbi inntaket til Storfossen kraftverk og forbi inntaket til Lillefossen kraftverk.
Med dei fastsette vilkåra meiner NVE at fordelane ved tiltaket samla sett er større enn dei negative konsekvensane for allmenne og private interesser.
Gjennom detaljplangodkjenning og oppfølging i byggetida, vil NVE sjå til at landskapsinngrepa knytt til utbygginga vert avgrensa i tilstrekkeleg grad.
