STATSBUDSJETTET: - Arbeidet med naturmangfaldet er budsjettvinnar på miljøsida i 2011-budsjettet.
Arbeidet med naturmangfaldet vert gitt ein ytterlegare auke med 80 millionar kroner i statsbudsjettet for 2011, skriv Miljøverndepartementet i ei pressemelding.
– Eg er glad for at vi i naturmangfaldåret 2010 gjer bevaring av naturmangfaldet til det viktigaste satsingsområdet på miljøsida i budsjettet. Bevaring av artar og naturtypar er ei av dei viktigaste utfordringane verda står overfor, seier miljø- og utviklingsminister Erik Solheim.
Naturmangfaldlova har ført til ei opprioritering av arbeidet med å ta vare på artar og naturtypar. Allereie i 2009-budsjettet auka løyvingane til naturmangfaldet med 345 millionar kroner, og i 2010-budsjettet med ytterlegare 150 millionar kroner. I framlegget til 2011-budsjett aukar løyvingane med nær 80 millionar kroner, slik at budsjettet til naturmangfaldet har auka med om lag 575 millionar kroner dei tre siste åra, heiter det i meldinga.
Løyvingane til forvaltning og skjøtsel i verneområda, mellom anna til etablering av ein ny modell for lokal forvaltning, aukar med 20 millionar kroner i 2011. Arbeidet med prioriterte artar og utvalde naturtypar blir styrkt med ti millionar kroner. Dei samla løyvingane til rovvilt aukar med 19 millionar kroner (gjeld erstatningar). Det blir føreslått ei ny løyving på fem millionar kroner til Artsdatabanken.
Villaks og vassdirektiv
Til arbeidet med å ta vare på den atlantiske villaksen aukar løyvingane med nær sju millionar kroner. Til vassforvaltning og arbeidet med å følgje opp EUs rammedirektiv for vatn, aukar budsjettet med 15 millionar kroner.
Arbeidet med heilskapleg og økosystembasert forvaltning av dei norske havområda blir styrkt med tre millionar kroner.
