Seier nei til Marine Harvest

Illustrasjon av planlagt settefiskanlegg ved Fjæraelva i Etne. Foto: Marine Harvest Norway AS

ETNE: Fylkesmannen i Hordaland fremjar motsegn mot at Marine Harvest Norway AS får etablere eit stort setjefiskanlegg for laks ved Fjæraelva.

Anlegget som er planlagt lokalisert ved nedre del av Fjæraelva i Etne, kan bli 35 dekar stort, ha ein årleg produksjon på 7,5 millionar sjøklar smolt, og gi 15 arbeidsplassar.

Bygginga vil innebere ei utfylling av området og plastring av elvebreidda på begge sider av elva for å unngå flaumskadar.

Setjefiskanlegget vil ha vassinntak på oppsida av den lakseførande strekninga og avlaupsvatnet vil gå ut i fjorden. Anlegget vil dermed påverka vassføringa på heile den lakseførande strekninga av Fjæraelva, skriv Fylkesmannens miljøavdeling i ei utsegn.

– Drastisk minking i vassføring

Ved minstevassføring i Fjæraelva vil planlagd setjefiskanlegg redusera vassføringa her med minimum 65 prosent. Det vil vera minst vassføring i vinterhalvåret. Dette skapar fare for tørrlegging og innfrysing av gytegroper. I tillegg vil anleggsarbeid og kanalisering av elva vere problematisk, skriv miljøavdelinga.

Konsekvensutgreiinga som er utarbeidd i samband med planen konkluderar med at tiltaket vil føre til negative verknader for hydrologi, fisk og ferskvassbiologi.

– Anlegget vil truga villaks, ål og sjøaure

Bestanden av villaks i Fjæraelva er rekna som «Sårbar – nær tålegrensa» i lakseregisteret til Direktoratet for Naturforvaltning. Elva har i tillegg ein bestand av sjøaure. Det er registrert ein fåtallig bestand av ål i Fjæraelva.

Ål står på raudlista for artar i Noreg. Den har her status som kritisk truga (CR). Artar i denne kategorien har då ekstremt høg risiko for å døy ut i Noreg. Kommunane har eit særskild ansvar for å ta vare på desse tre artane, skriv miljøavdelinga.

Fylkesmannen meiner at bygging av setjefiskanlegg som planlagt vil ha negativ påverknad på desse bestandane og deira naturlege leveområde.

Fylkesmannen fremjar motsegn til planen

Fylkesmannen ser at dei samfunnsøkonomiske verknadane, med inntil 15 årsverk knytt til anlegget, kan vere positiv.

Samstundes meiner etaten at verknadane på biologisk ferskvassliv vil vera negative, og kan føre til at ein sårbar bestand av villaks og den raudlista arten ål døyr ut.

«Omsøkte etablering vil difor ikkje vera i tråd med prinsippet om ei langsiktig og berekraftig samfunnsplanlegging», skriv Fylkesmannen og fremjar motsegn til planen.