Fiskeri- og kystdepartementet har fastsett ei ny forskrift for å avgrense spreiing og utbrot av pankreassjukdom forårsaka av virusvarianten SAV2 i Midt-Noreg.
Pankreassjukdom (PD) på grunn av virusvarianten SAV2 er ein relativt ny sjukdom i norsk lakseoppdrett. Denne varianten av PD har ført til store tap i andre land, mellom anna i Skottland. I Noreg har PD til no hovudsakleg vore forårsaka av varianten SAV3.
Den norske strategien for kontroll med PD har gått ut på å redusere konsekvensane av sjukdommen på Vestlandet der sjukdommen er vidt utbreidd, og å hindre spreiing nord for Hustadvika, mellom anna med rask utslakting dersom PD blir påvist nord for Hustadvika.
– I seinare tid har vi hatt fleire utbrot av den nye varianten av PD i Møre- og Romsdal og Sør-Trøndelag. Dette har gjort det nødvendig å endre strategien for kontroll med PD, skriv Fiskeri- og kystdepartementet i ei pressemelding.
Det vil ikkje lenger bli automatisk pålegg om utslakting av fisk med PD forårsaka av SAV2 i det mest belasta området i Midt-Noreg. Det blir sett strenge krav til helsekontroll og smittehygiene for å hindre spreiing ut av dette området.
Forskrifta er fastsett av setjestatsråd Trond Giske, og trer i kraft straks.
Les meir om den nye forskrifta i ei orientering frå Mattilsynet, sjå nedanfor.
Les også: Nye tiltak i kampen mot PD 12.11.2012
