Sølvtrans med trippel ordre på brønnbåt frå Myklebust Verft

Slik skal dei tre nye brønnbåtane til Sølvtrans Rederi AS sjå ut. Illlustrasjon: Kongsberg Maritime CM AS

Ålesund: Sølvtrans Rederi har inngått ei ny brønnbåtkontrakt med Myklebust Verft i Sande.

Fartøyet blir det tredje i ein serie basert på designet Kongsberg NVC 389, fra Kongsberg Maritime CM AS, som Sølvtrans frå før har to av i ordre ved verftet.

Lastekapasiteten blir på 4000 m³. Og også dette skroget skal byggast ved det tyrkiske verftet Hat-San. Levering av det som vert bygg nummer 77 frå Myklebust Verft, er kontraktsfesta til april 2022.

– For å kunne møte etterspørselen etter brønnbåttenester både nasjonalt og internasjonalt, så har Sølvtrans valt å kontrahere nok ein brønnbåt ved Myklebust Verft, seier reiar og administrerande direktør i Sølvtrans Rederi AS, Roger Halsebakk, i ei pressemelding.

– Vi opplever stor etterspørsel etter våre brønnbåtar i denne klassa. Som selskap er vi alltid opptatt av å kunne tilby det ypparste av kvalitet både når det gjeld båtar og fiskehandtering. I tillegg er det viktig å kunne bidra til lokal verdiskaping og arbeidsplassar. Med denne kontrakten oppnår vi dette, fortel Halsebakk.

– For ei veke sidan tok vi imot tre nye lærlingar og det er ei ekstra glede å kunne fortelje dei om denne kontrakten som sikrar spennande arbeidsoppgåver i deira læretid, seier dagleg leiar Inge-Jonny Hide i Myklebust Verft AS.

– For tida er sju av 142 tilsette lærlingar og TAF-elevar. Når Sølvtrans vel å bygge lokalt er dei også med på å legge grunnlag for neste generasjon av stolte skipsbyggarar, seier Hide.

Les også: Myklebust signerer ny kontrakt med Sølvtrans