Fiskeri- og kystdepartementet og Eksportutvalet for fisk aukar bidraga sine til Fiskesprell også i 2011.
Fiskesprell har sidan startsåret 2007 hatt ei kraftig budsjettutvikling frå rundt 3 millionar kroner i året til rundt 10 millionar i 2011.
– Fiskeprell er ei investering i et sunnare kosthald for norske skole- og barnehagebarn. Med større økonomiske ressursar vil mange fleire tilsette i barnehagane kunne gå på kurs og vi får eit fullverdig tilbod til barne- og ungdomskoletrinnet med undervisningsmateriell og råvarestøtte, seier fiskeri- og kystminister Lisbeth Berg-Hansen i ei pressemelding.
– Det kan også vere aktuelt med andre tiltak, som kurs for tilsette i SFO og vidareutdanningskurs for lærarar i mat- og helsefag, seier Berg-Hansen.
Det er Fiskeri- og kystdepartementet, Helse- og omsorgsdepartementet, Eksportutvalet for fisk og fiskesalslaga som står saman om prosjektet «Fiskesprell». Prosjektet er ei konkret oppfølging av regjeringa sin handlingsplan for betre kosthald i befolkninga, der barn og unge er ei viktig målgruppe. Også Nasjonalt institutt for ernærings- og sjømatforsking og Helsedirektoratet er med i arbeidet som nå er nasjonalt.
Sidan starten har 790 barnehagar i alle fylke vore på kurs og lært om dei positive helseverknadene sjømaten gir og fått praktisk trening i å lage enkle og barnevennlege fiskerettar. Prosjektet som først var retta mot barnehagar og ungdomsskolar i nokre prøvefylke har gradvis blitt utvida, og er no eit nasjonalt tilbod til alle fylke. Tilbodet er også utvida til å gjelde barneskolane.
Sjå nettsidene til Fiskesprell: fiskesprell.no
